Urtarrilaren 11

BEZPERAK

Agurra

V/. Zatozkit lagun, ene Jainko.
R/. Jauna, zatoz laster ni laguntzera.

V/.  Aintza Aitari eta Semeari,
        eta Espiritu Santuari.
        Lehen lez, orain eta beti,
        eta amaibako egunetan. Amen. Aleluia.

Goratzarrea 

GOIZ-ARGIA 

Goiz-argia,
hilik zeudenen / eguzkia:
itsuengana / etorria,
goza dezaten / argi berri /
–pizgarria.
Zatoz, / Jesus Jauna,
diren guztien / argia.

Heldu da; hona
Jaunaren eguna.
Ongi etorri,
Jaunak igorri
Salbatzailleari!

Jainko-Bildots,
berriz herrira / gidaria;
odola duzu, / isuria,
ardi galduei / emateko /
–Zuk bizia.
Zatoz, / Jesus Jauna,
ur bizi duen / artzaina.

Jesu Kristo,
Aitak Zuregan / du gozoa;
uretan sartuz / eta hilez,
eman diozu / gizonari /
–Bataioa.
Zatoz, / Jesus Jauna,
erreinurako / bidea.

Harkaitz berri,
ibai bizien, / iturria:
or zaude bihotz-/ irekia,
ase dadien / fededunen /
–egarria.
Zatoz, / Jesus Jauna,
sekulako ur / bizia.

Suzko laino,
gauez argitzen / gaituzuna:
Kalbarioko / minen barna,
agertu duzu / gu nolaz joan /
–zeruraino.
Zatoz, / Jesus Jauna,
Jainko Aitaren / berdina.

Ezkon-berri,
gurutz-eztaien / hain egarri:
ura diguzu / ardo egin,
Jainko-semeen / sinistea /
–piztu dadin.
Zatoz, / Jesus Jauna,
zure lurraren / pizgarri.

Jainko-Seme,
Espirituak / argitua:
Zure mintzoa / da zabaldu,
eta piztu du / munduz-mundu /
goiko sua.
Zatoz, / Jesus Jauna,
goiko aintzaren / betea.

 

Antifonak eta Salmoak (II. Astekoak)

Astelehena,   Martitzena,  

Eguaztena,   Eguena,  Barikua.

 

Jainkoaren hitza

Erm 8, 3-4

      Legeak giza-makaltasunagaitik ezin eikeana, Jainkoak egin dau: bere Semea bialdu dau gure giza-izate bardinean, pekatuzkoan, pekatuagaitik opari eginik; eta Harek, bere izate hilkorrean, hondatu egin dau, pekatua; holan Legeak nahi izango leuken ona bete daiteke gugan, ez gabilz-eta haragiaren arabera, Espirituarenera baino.
 

Galderantzuna 

V/. Bedeinkazino izango da * herri guztientzat.
R/. Bedeinkazino izango da * herri guztientzat. 

V/. Lurreko leinu guztiek dohatsua deituko deutsoe.
R/. Herri guztientzat. 

V/. Aintza Aitari eta Semeari eta Espiritu Santuari.
R/. Bedeinkazino izango da * herri guztientzat.
 

Magn. ant. Amesetan harturik albistea, beste bide batetik joan ziran Magoak euren lurraldera.

Lk 1, 46-55

Handiesten dau nire arimak Jauna,
   pozaren pozez daukat nire barrua;
   Jainkoa da-ta nire salbamena,
   ikusi dau-ta mirabe honen ezereztasuna.

Dohatsu deituko nabe gaurtik gizaldi guztiek,
   handiak egin deustaz-eta Ahalguztidunak:
   Santua da Haren izena,
   eta Haren errukia, gizaldiz-gizaldi †
   bildur deutsoenengana.

Bere besoaren indarra erabili dau,
   buru harroak triskatu dauz;
   bota dauz euren aulkitik handikiak,
   eta gora jaso dauz ezerezak;
   ondasunez bete dauz gosez egozanak
   eta esku hutsik bialdu asko eukenak.

 Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Amesetan harturik albistea, beste bide batetik joan ziran Magoak euren lurraldera.
 

Eskariak

      Otoitz egin deiogun, Kristo herrien argi egin eban zeruko Aitari, esanez:

Gure Aita, entzun gaizuz.

      —Zabaldu eizu zure Eleizea, * zure Semearen aintza agertu daiten.

      —Jakintsuak Jesusengana zuzendu dituzun betiko Aita, * erakutsi eiezu, egi-bila dabizanei, zure Semea.

      —Deitu eizuz atzerritarrak zure argi miragarrira, * Jesusen izenera belaun guztiak makurtu daitezan.

      —Bialdu eizuz langileak zure uztara, * behartsuei beari ona zabaltzeko eta grazi-garaia aldarrikatzeko.

      —Emoiezu hildakoei erospen osoa, * Kristo zure Semeak ekarri deuskun garaipenaz poztu daitezan.

Gure Aita zeruetan zarana,
santu izan bedi zure izena,
etor bedi zure erreinua,
egin bedi zure nahia
zeruan bezela lurrean ere.
Emoiguzu gaur
egun honetako ogia,
parkatu gure zorrak
geuk ere geure zordunei
parkatzen deutsegun ezkero,
ez eiguzu itzi tentazinoan jausten
baina atara gagizuz gatxetik.
 

Otoitza

      Jainko ahalguztiduna, izar baten bidez iragarri zeutsan munduari Salbatzailearen jaiotza; egizu, misterio horrek argitu daizala gure bihotzak, eta gero ta handiagoak egin daitezala haren frutuak. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-eta gizaldi eta gizaldietan.

Amaierea

V/. Jauna zuekin.
R/. Eta zure Espirituarekin

V/. Bedeinkatu zaizela Jainko ahalguztidunak:
      Aitak eta Semeak eta Espiritu Santuak.
R/. Amen.

V/. Zoaze Jaunaren bakean.
R/. Eskerrak Jainkoari.